![]()
ऑनलाईन फसवणुकीत १५ लाखांच्या रक्कमेची फसवणूक; वाकड पोलिस ठाण्यात गुन्हा दाखल
पुणे, वाकड:
वाकड पोलीस ठाण्याच्या हद्दीत मोठ्या ऑनलाईन फसवणुकीच्या घटनेचा पर्दाफाश झाला आहे. फिर्यादी पुरूष वय ४३ वर्षे, व्यवसाय नोकरी, रा. पाटीलनगर, वेंगसकर क्रिकेट अॅकेडमीजवळ, थेरगाव पुणे यांनी दिलेल्या तक्रारीनुसार, १ जुलै २०२४ रोजी १५:३६ वा. त्यांचे राहते घरात असताना त्यांच्या सोबत मोठी फसवणूक करण्यात आली. या प्रकरणात पोलिसांनी भारतीय न्याय संहिता कलम ३१८ (४), ३१५, २०४, ३(५) अंतर्गत गुन्हा नोंदवला आहे.
गुन्ह्याचा तपशील:
फिर्यादीला इसम अजय मिश्रा आणि सीबीआय ऑफिसर असल्याचे सांगणारा इसम तसेच सुरेश कोल्ड वॉटर खाते क्र. ४२७६५६४७३४३ आयएफएससी नं. एसबीआयएन ०००५०७४ चा खाते मालक या तिघांनी मिळून फसवणूक केली. फिर्यादीला फोन करून आरोपीने सत्र न्यायालय लखनऊ येथून बोलत असल्याचे सांगितले व त्याचे इतर सहका-यांशी संगनमत करून फिर्यादीवर रावी इन्व्हेस्टमेंट प्रा. लि. या कंपनीची केस असल्याचे सांगून त्यांना कृष्णानगर पोलीस ठाणे लखनऊ येथे बोलावण्यास सांगितले.
फिर्यादीला टेलीग्राम अॅप डाऊनलोड करण्यास सांगून, दुसरा इसम सीबीआय ऑफिसर असल्याचे सांगत होता. त्याने फिर्यादीला मनी लॉन्ड्रींग व किडनॅपींगच्या खोट्या केसेस असल्याचे सांगून अटक करण्याची धमकी दिली तसेच त्यांच्या मालमत्तेवर जप्ती करण्याची खोटी माहिती दिली. आरोपींनी फिर्यादीला भिती दाखवून त्यांचेकडून सुरेश कोल्ड वॉटर खाते क्र. ४२७६५६४७३४३ आयएफएससी नं. एसबीआयएन ०००५०७४ या खात्यावर १५,७४,६८८/- रुपये जमा करण्यास भाग पाडले. ही रक्कम आरोपींनी स्वतःच्या आर्थिक फायद्यासाठी वापरली.
गुन्हा दाखल:
दि. ०८ जुलै २०२४ रोजी २३:३६ वाजता वाकड पोलीस ठाण्यात गुन्हा दाखल करण्यात आला आहे. आरोपींना अद्याप अटक करण्यात आलेली नाही.
सतर्कतेचा इशारा:
पोलिसांनी जनतेला ऑनलाईन फसवणुकीपासून सावधान राहण्याचे आवाहन केले आहे. कोणत्याही अनोळखी व्यक्तीच्या कॉल्सना प्रतिसाद देऊ नये आणि आपल्या बँक खात्याची माहिती कोणत्याही परिस्थितीत शेअर करू नये.
पुणे सिटी लाईव्ह मीडिया नेटवर्क