पुणे, ११ सप्टेंबर: पुणे जिल्ह्यातील ताथवडे येथील एका पेट्रोल पंपावर (Petrol Pump) सिगारेट पिण्यास मनाई केल्याच्या क्षुल्लक कारणावरून तीन तरुणांनी पेट्रोल पंपावरील कर्मचारी आणि एका तरुणावर चाकूने प्राणघातक हल्ला (Deadly attack) केला आहे. या हल्ल्यात तिघेही गंभीर जखमी झाले असून, एका आरोपीला अटक करण्यात आली आहे.Pune News
ही घटना ८ सप्टेंबर, २०२५ रोजी रात्री १०.५० वाजता ताथवडे येथील चिंतामणी पेट्रोल पंपासमोर घडली. फिर्यादी स्वप्निल बाळासाहेब नवले (वय ३८) यांनी वाकड पोलिस स्टेशनमध्ये तक्रार दाखल केली आहे. फिर्यादीचा चुलत भाऊ श्रीधर नवले पेट्रोल पंपासमोर बसलेले असताना, तीन अज्ञात तरुण दुचाकीवरून पेट्रोल भरण्यासाठी आले.
पोलिसांनी दिलेल्या माहितीनुसार, या तरुणांना सिगारेट पिण्यास मनाई केल्यामुळे त्यांना राग आला. रागाच्या भरात, मोटरसायकलवरील चालक सौरभ ज्ञानेश्वर खंडाळकर याने पेट्रोल भरणाऱ्या कर्मचारी प्रसाद फटाटे याला धडक दिली. यानंतर, प्रसादला वाचवण्यासाठी फिर्यादी, त्यांचा भाऊ श्रीधर आणि पेट्रोल पंपावरील कर्मचारी गणेश जगताप मध्ये पडले.
याच वेळी, तिन्ही आरोपींनी तिघांवरही शिवीगाळ करत लाथा-बुक्क्यांनी मारहाण केली. आरोपींनी आपल्याकडील लोखंडी धारदार चाकू (Knife) काढून तिघांवरही हल्ला केला.
- एका आरोपीने फिर्यादी स्वप्निल नवले यांच्या पोटात चाकूने वार करून त्यांना जखमी केले.
- आरोपी विहान आणि त्याच्या एका मित्राने श्रीधर नवले यांच्या छातीत चाकू खुपसून त्यांना गंभीर जखमी केले.
- आरोपी सौरभ खंडाळकर याने गणेश जगताप याच्या पाठीमागे आणि उजव्या हातावर चाकूने वार केले.
