पिंपरी हादरले! फ्रुटी दिली नाही , तरुणाच्या मांडीत गोळी झाडली!
पुणे, ०२ ऑगस्ट २०२५: पिंपरीतील प्रेम गल्ली परिसरात एका ओमकार जनरल स्टोअर्समध्ये भरदिवसा लुटमारीचा थरार अनुभवण्यास मिळाला. फ्रुटी मागण्याच्या बहाण्याने आलेल्या एका अज्ञात चोरट्याने दुकानदाराच्या गळ्यातील सोन्याची चेन हिसकावली. प्रतिकार करताच त्याने चक्क पिस्तूल काढून गोळी झाडली आणि तरुणाला गंभीर जखमी करून पळ काढला. या घटनेने परिसरात भीतीचे वातावरण निर्माण झाले आहे.
लुटमारीचा थरार
शुक्रवारी (दि. ०१ ऑगस्ट २०२५) दुपारी १:०० ते १:३० वाजण्याच्या सुमारास ही धक्कादायक घटना घडली. पिंपरीतील प्रेम गल्ली येथील लक्ष्मी कृपा बिल्डिंगमधील बॉम्बे सँडविचसमोर असलेल्या ओमकार जनरल स्टोअर्समध्ये रॉकी उर्फ भावेश कन्हलाल कुकराणी (वय २०) हा तरुण नेहमीप्रमाणे दुकानात होता.
त्यावेळी, एका काळ्या रंगाच्या मोटारसायकलवरून एक अज्ञात इसम आला. त्याने हिंदीतून “दस वाला फ्रुटी दे!” असे म्हणत रॉकीकडे फ्रुटी मागितली. रॉकी दुकानाच्या काऊंटरबाहेर असलेल्या फ्रिजमधून फ्रुटी काढत असताना, त्या चोरट्याने रॉकीच्या गळ्यातील ९०,००० रुपये किमतीची सोन्याची चेन जबरदस्तीने हिसका मारून ओढली.
चेन तुटली नाही, हे पाहून चोरटा अधिकच बिथरला. त्याने लगेच आपल्याकडील पिस्तूल दाखवून रॉकीला धमकावले आणि पुन्हा एकदा चेन ओढली. यावेळी अर्धी चेन त्याच्या हातात आली. रॉकीच्या हातात राहिलेली उर्वरित चेनही मिळावी या उद्देशाने, त्या निर्दयी चोरट्याने क्षणाचाही विचार न करता आपल्याकडील पिस्तूलने रॉकीच्या डाव्या पायाच्या मांडीवर फायर केले. गोळी लागल्याने रॉकी गंभीर जखमी झाला, आणि चोरट्याने घटनास्थळावरून धूम ठोकली.
या प्रकरणी पिंपरी पोलीस ठाण्यात गु.र.नं. ३७७/२०२५, भारतीय न्याय संहिता २०२३ चे कलम ३०९ (६), ३११, भारतीय हत्यार कायदा कलम ३(२५), आणि महाराष्ट्र पोलीस कायदा कलम ३७ (१) (३) सह १३५ नुसार अज्ञात आरोपीविरोधात गुन्हा दाखल करण्यात आला आहे.
वरिष्ठ पोलीस निरीक्षक कडलग या प्रकरणाचा तपास करत आहेत. आरोपीचा शोध घेण्यासाठी परिसरातील सीसीटीव्ही फुटेज तपासले जात असून, स्थानिक गुन्हे शाखेची पथके कामाला लागली आहेत. भरदिवसा झालेल्या या गोळीबाराच्या घटनेने पिंपरीतील कायदा व सुव्यवस्थेवर प्रश्नचिन्ह निर्माण झाले आहे.
