श्रीमंत दगडूशेठ गणपती ट्रस्टच्या जय गणेश रुग्णसेवा अभियानांतर्गत जागतिक फिजिओथेरपी दिनानिमित्त जनजागृती
पुणे, 11 सप्टेंबर 2023: श्रीमंत दगडूशेठ हलवाई सार्वजनिक गणपती ट्रस्टच्या जय गणेश रुग्णसेवा अभियान अंतर्गत मॉर्डन फिजिओथेरपी कॉलेज शिवाजीनगर पुणे यांच्या संयुक्त विद्यमाने आज जागतिक फिजिओथेरपी दिनानिमित्त दगडुशेठ गणपती मंदिर जवळ फिजिओथेरपी संदर्भात पथनाट्य करून जनजागृती करण्यात आली.
या पथनाट्यात फिजिओथेरपीच्या विविध प्रकारांचा आणि त्याच्या फायद्यांचा उल्लेख करण्यात आला. फिजिओथेरपी हे एक वैद्यकीय क्षेत्र आहे जे शारीरिक हालचालींवर लक्ष केंद्रित करते. फिजिओथेरपिस्ट्स रुग्णांना त्यांच्या शारीरिक हालचाली सुधारण्यात आणि वेदना कमी करण्यात मदत करतात.
पथनाट्यात शारीरिक अपंगत्व असलेल्या व्यक्तीची कथा सांगण्यात आली. कथेतील व्यक्तीला कार अपघातात गंभीर दुखापत झाली होती. त्याला फिजिओथेरपीच्या मदतीने चालणे आणि इतर शारीरिक हालचालींवर नियंत्रण मिळवता आले.
या पथनाट्याद्वारे लोकांना फिजिओथेरपीच्या महत्त्वाबद्दल जागरूक करण्याचा प्रयत्न करण्यात आला. या कार्यक्रमाला श्रीमंत दगडूशेठ गणपती ट्रस्टचे उपाध्यक्ष अशोक गोडसे, मॉर्डन फिजिओथेरपी कॉलेजचे प्राचार्य डॉ. जयंत काळे, ट्रस्टचे आरोग्य समन्वयक राजेंद्र परदेशी आदी उपस्थित होते.
जय गणेश रुग्णसेवा अभियानांतर्गत ट्रस्ट दरवर्षी विविध प्रकारच्या आरोग्य सेवा कार्यक्रमांचे आयोजन करते. या अभियानाचा उद्देश गरजू आणि गरीब रुग्णांना मोफत आरोग्य सेवा प्रदान करणे हा आहे.