पुण्यातील बावधन परिसरातील ‘स्टार अल्टायर’Star Altair सोसायटीमध्ये एका किरकोळ वादातून मोठी मारामारी झाल्याची घटना समोर आली आहे. दि. १२ ऑक्टोबर २०२५ रोजी दुपारी साडेतीन वाजण्याच्या सुमारास सोसायटीच्या पी-१ पार्किंगमध्ये घडलेल्या या घटनेने परिसरात खळबळ उडाली आहे. फिर्यादीने दिलेल्या तक्रारीवरून भारतीय न्याय संहिता अंतर्गत गंभीर कलमांखाली गुन्हा दाखल करण्यात आला असून, यामुळे निवासी सोसायट्यांमधील सुरक्षिततेचा प्रश्न पुन्हा एकदा ऐरणीवर आला आहे.
मिळालेल्या माहितीनुसार, फिर्यादी श्री. सुहीत सुखदेव कलुबर्मे (वय ३४, रा. फ्लॅट नं. ३०३, स्टार अल्टायर, बावधन) यांनी दिलेल्या माहितीनुसार, घटनेच्या दिवशी आरोपी ऋत्विक मिरघे हा फिर्यादीकडे रागाने पाहत होता. याबाबत फिर्यादीने विचारणा करताच, आरोपी ऋत्विकला त्याचा राग अनावर झाला. त्याने तात्काळ फिर्यादीला शिवीगाळ करण्यास सुरुवात केली आणि हाताने मारहाण केली. फिर्यादीने स्वतःचा बचाव करत प्रतिकार करण्याचा प्रयत्न केला असता, ऋत्विक मिरघेने त्याचे इतर चार साथीदार बोलावले.
या पाच जणांच्या टोळक्याने फिर्यादी सुहीत कलुबर्मे यांना बेदम मारहाण केली. त्यांनी लाकडी दांडक्याने आणि कमरेच्या पट्ट्याने मारहाण करत फिर्यादीला गंभीर दुखापत केली. इतकेच नाही तर, त्यांना जीवे मारण्याची धमकीही देण्यात आली. सोसायटीच्या पार्किंगसारख्या सार्वजनिक ठिकाणी, दिवसाढवळ्या घडलेल्या या घटनेमुळे ‘स्टार अल्टायर’ सोसायटीतील रहिवाशांमध्ये भीतीचे आणि चिंतेचे वातावरण पसरले आहे.
या प्रकरणी बावधन पोलीस ठाण्यात गु. रजि. नं. ४६८/२०२५ अन्वये दि. १४ ऑक्टोबर २०२५ रोजी दुपारी २ वाजून ५९ मिनिटांनी गुन्हा दाखल करण्यात आला आहे. भारतीय न्याय संहिता कलम ११८ (१), ११५ (२), ३५२, ३५१(२), १८९(१), १८९(२), १९०, १९१(२), १९१(३) या गंभीर कलमांखाली आरोपी ऋत्विक मिरघे आणि त्याचे इतर तीन साथीदार यांच्याविरुद्ध कारवाई सुरू करण्यात आली आहे. आरोपी आशिष मिरघे आणि इतर तीन साथीदार अद्याप फरार असून, पोलीस त्यांचा कसून शोध घेत आहेत.
या प्रकरणाचा पुढील तपास बावधन पोलीस ठाण्याच्या महिला पोलीस उपनिरीक्षक (मपोउनि) शितल गिरी (मो. नं. ८४४६७१४०३५) करत आहेत. निवासी संकुलांमध्ये घडणाऱ्या अशा घटना रोखण्यासाठी आणि आरोपींना कठोरात कठोर शिक्षा मिळावी अशी मागणी स्थानिक नागरिकांकडून होत आहे. पोलिसांनी या प्रकरणाचा सखोल तपास करून सर्व आरोपींना लवकरात लवकर अटक करून न्याय मिळवून देण्याचे आश्वासन दिले आहे.