पुणे: चाकणमध्ये अॅम्ब्युलन्स व्यवसायातून खंडणीची मागणी, न दिल्यास जीवे मारण्याची धमकी देत कोयत्याने हल्ला; तिघे अटकेत

पुणे: जिल्ह्यातील खेड तालुक्यातून एक धक्कादायक घटना समोर आली आहे. चाकण परिसरात अॅम्ब्युलन्स व्यवसायातून महिन्याला लाखो रुपयांची खंडणी मागणाऱ्या टोळीने खंडणी न दिल्यास जीवे मारण्याची धमकी देत, वाहनावर दगडफेक केली आणि कोयत्याने हल्ला करण्याचा प्रयत्न केला. या प्रकरणी महाळुंगे एमआयडीसी पोलिसांनी तात्काळ कारवाई करत तीन आरोपींना अटक केली असून, फरार आरोपींचा शोध सुरू आहे.Extortion from ambulance business in Chakan

खंडणीची मागणी आणि धमकीचा थरार
मिळालेल्या माहितीनुसार, खराबवाडी, ग्रामपंचायत समोर, हिताची ए.टी.एम च्या पाठीमागे, कड आळी, ता. खेड, जि. पुणे येथे दिनांक ०३ नोव्हेंबर २०२५ रोजी मध्यरात्री ००:४८ वाजता ही घटना घडली. फिर्यादी अभिषेक सुनील पानसरे (वय २२, धंदा-ट्रान्सपोर्ट व्यवसाय, रा. खराबवाडी) यांनी महाळुंगे एमआयडीसी पोलीस ठाण्यात तक्रार दाखल केली आहे. फिर्यादींच्या तक्रारीनुसार, त्यांचा ओळखीचा आरोपी ऋषिकेश सूर्यकांत सूळ याने अभिषेकला सांगितले की, आरोपी विष्णू उर्फ बाळा नामदेव कुऱ्हाडे (वय ३०) आणि किशोर उर्फ साईनाथ नामदेव कुऱ्हाडे (वय २८) यांनी प्रतिक जाधव याच्या अॅम्ब्युलन्स चालू ठेवायच्या असतील तर प्रत्येक अॅम्ब्युलन्समागे दरमहा ५०००/- रुपये द्यावे लागतील. प्रतिक जाधव यांच्या एकूण ७ अॅम्ब्युलन्स असल्याने त्यांना महिन्याला ३५,०००/- रुपये द्यावे लागतील, अन्यथा प्रतिक जाधवच्या अॅम्ब्युलन्स चाकणमध्ये चालू देणार नाही आणि अभिषेकलाही ‘खल्लास’ करू अशी गंभीर धमकी दिली.

दगडफेक आणि कोयता हल्ला करून दहशत
या धमकीनंतर आरोपी ऋषिकेश सूळ याने तेथे असलेला दगड उचलून फिर्यादीच्या ह्युंडाई वेरणा (क्र. एम.एच. १४ जे.एम. ८४४८) गाडीच्या समोरील काचेवर फेकला. त्यावेळी त्याच्या कमरेला कोयता खोसलेला स्पष्ट दिसत होता. “ही तर फक्त झलक आहे,” असे म्हणत त्याने अभिषेकला अधिक भयभीत करण्याचा प्रयत्न केला. ऋषिकेशचे मित्र थोड्या अंतरावर असताना ते त्याच्याकडे आले. त्यानंतर ऋषिकेशने कमरेला असलेला कोयता काढून हवेत फिरवत आजूबाजूच्या लोकांमध्ये दहशत निर्माण केली.

पाठलाग, हल्ल्याचा प्रयत्न आणि पोलिसांची कारवाई
दहशत निर्माण केल्यानंतर तिघे आरोपी मोटारसायकलवर बसून पळून जात असताना, फिर्यादी अभिषेकने दोन अनोळखी इसमांपैकी एकाला पकडले. त्याने आपले नाव ओमकार गौतम टोके (वय २२, रा. मेदनकरवाडी, चाकण) असे सांगितले, तर दुसऱ्याचे नाव ‘मट्या’ (पूर्ण नाव पत्ता माहित नाही) असे सांगितले. यानंतर फिर्यादीचे मित्र आशिष, अजय आणि अनिकेत यांनी वेरणा गाडी घेऊन त्यांचा पाठलाग केला. पाठलाग सुरू असताना आरोपींची मोटारसायकल बंद पडली. फिर्यादीचे मित्र त्यांच्याजवळ गेले असता, आरोपी ऋषिकेशने कमरेचा कोयता काढून मित्र आशिषच्या डोक्यात घालण्याचा प्रयत्न करत जीवे मारण्याचा प्रयत्न केला. आशिषने तो वार चुकवून त्याला ढकलून दिले. त्यानंतर “तुम्ही माझ्याजवळ आले तर मी तुम्हाला जीवे मारून टाकील,” अशी धमकी देत दोघे (ऋषिकेश व मट्या) तेथून पळून गेले. आरोपींनी बंद पडलेली स्प्लेंडर मोटारसायकल सोडून पळ काढला. नंतरच्या काळात घरासमोरून संशयित अॅम्ब्युलन्स गेल्याने फिर्यादी व मित्र कुणाल, अजय, अनिकेत यांनी पाठलाग केला, परंतु ती मिळून आली नाही.

गुन्हा दाखल आणि तिघांना अटक
या प्रकरणी अभिषेक पानसरे यांनी दिलेल्या तक्रारीनंतर दिनांक ०३ नोव्हेंबर २०२५ रोजी १५:०३ वाजता महाळुंगे एमआयडीसी पोलीस स्टेशनमध्ये भारतीय न्याय संहिता २०२३ कलम १०९, ३०८(२), ३२४(४), ६१(२), ३(५), क्रिमिनल अॅमेनमेन्ट कलम ७, शस्त्र अधिनियम १९५९ कलम ४(२५) सह महाराष्ट्र पोलीस अधिनियम १९५१ चे कलम ३७(१)/१३५ प्रमाणे गुन्हा दाखल करण्यात आला आहे. पोलिसांनी तात्काळ कारवाई करत आरोपी विष्णू उर्फ बाळा नामदेव कुऱ्हाडे, किशोर उर्फ साईनाथ नामदेव कुऱ्हाडे आणि ओमकार गौतम टोके या तिघांना अटक केली आहे. फरार आरोपी ऋषिकेश सूर्यकांत सूळ आणि मट्या यांचा पोलीस कसून शोध घेत आहेत. चाकण परिसरातील अॅम्ब्युलन्स व्यवसायिकांमध्ये या घटनेमुळे भीतीचे वातावरण असून, अशा गुन्हेगारीला आळा घालण्याची मागणी जोर धरत आहे. या प्रकरणाचा पुढील तपास महाळुंगे एमआयडीसी पोलीस करत आहेत.