पुणे, ९ सप्टेंबर: पुणे कृषी उत्पन्न बाजार समिती (Pune APMC) ही गुंड आणि भ्रष्टाचाऱ्यांच्या विळख्यात अडकली असून, तिथे सुमारे २०० कोटी रुपयांचा भ्रष्टाचार झाल्याचा गंभीर आरोप आमदार रोहित पवार (Rohit Pawar) यांनी केला आहे. विशेष म्हणजे, या भ्रष्टाचाऱ्यांना उपमुख्यमंत्री अजित पवार (Ajit Pawar) यांचा वरदहस्त असल्याचा दावाही त्यांनी केला आहे. या संपूर्ण प्रकरणाची चौकशी झाली नाही, तर १५ दिवसांत मोठं आंदोलन छेडण्याचा इशाराही त्यांनी सरकारला दिला आहे.
काय आहे आरोप?
रोहित पवार यांनी पत्रकार परिषद घेऊन या प्रकरणाची सविस्तर माहिती दिली. त्यांच्यासोबत प्रवक्ते विकास लवांडे हे देखील उपस्थित होते. पवारांनी बाजार समितीतील अनेक गैरव्यवहारांची यादीच सादर केली.
- बेकायदेशीर भाडे वसुली (जी-५६ गैरव्यवहार): बाजार समितीच्या जागेतून बेकायदेशीरपणे भाडे गोळा केले जात असल्याचा आरोप आहे.
- अनधिकृत परवाने: सुमारे ४ हजार लोकांना अनधिकृत परवाने दिले गेले आहेत.
- अतिक्रमण आणि अनधिकृत गाळे: बाजार समितीच्या जागा अनधिकृतपणे भाड्याने दिल्या जात आहेत.
- नोकरीत भ्रष्टाचार: रोजंदारी सेवकांच्या कायम नियुक्तीत मोठ्या प्रमाणात भ्रष्टाचार झाला आहे.
- शौचालयांचा गैरवापर: शेतकऱ्यांसाठी असलेली शौचालये बंद करून त्या जागांवर सलून आणि गुटखा विक्रीचे अड्डे सुरू आहेत.
- इतर गैरव्यवहार: पार्किंगच्या नावाखाली लूट, सुरक्षारक्षकांच्या नियुक्तीत भ्रष्टाचार आणि स्वच्छता कंत्राटात गैरव्यवहार असे अनेक गैरप्रकार सुरू आहेत.
रोहित पवारांनी आरोप केला आहे की, या गैरव्यवहारांची चौकशी करण्यासाठी डीडीआर जगताप यांची नेमणूक झाली असली, तरी तेच गैरव्यवहारात अडकले आहेत. तसेच, अधिकारी आणि मंत्र्यांपर्यंत ‘हप्ते’ पोहोचतात अशी चर्चा असल्यामुळे या प्रकरणावर पांघरूण घालण्याचा प्रयत्न सुरू आहे.
अजित पवारांनी खुलासा करावा
रोहित पवारांनी थेट उपमुख्यमंत्री अजित पवारांवर निशाणा साधत म्हटले की, भ्रष्टाचाऱ्यांना अजित पवारांचा वरदहस्त असल्याचं तेच सांगत आहेत. त्यामुळे अजितदादांनी यावर खुलासा करावा. जर सरकारने पुढील १५ दिवसांत यावर कोणतीही कारवाई केली नाही, तर शेतकऱ्यांच्या सोबत मोठं आंदोलन सुरू केले जाईल, असा इशारा त्यांनी दिला.