Kalewadi Pune News : काळेवाडी येथे घटस्फोटाच्या वादातून तरुणाने पत्नीवर ब्लेडने जीवघेणा हल्ला केला
पुणे: काळेवाडी येथे (Kalewadi Pune News)एका २२ वर्षीय तरुणीला तिच्या पतीने तलाक (घटस्फोट) न दिल्याच्या रागातून आणि चारित्र्यावर संशय घेऊन ब्लेडने जीवघेणा हल्ला केल्याची धक्कादायक घटना समोर आली आहे. हल्ल्यात महिला गंभीर जखमी झाली असून, पोलिसांनी पतीसह त्याच्या साथीदाराला अटक केली आहे.
नेमकं काय घडलं?
१६ ऑगस्ट २०२५ रोजी सकाळी १० वाजताच्या सुमारास ही घटना थेरगावातील एम.एम. चौकातील एका स्क्रॅप दुकानासमोर घडली. याप्रकरणी पीडित २२ वर्षीय महिलेने पोलिसांत तक्रार दाखल केली आहे.
फिर्यादी महिला नोकरी करत असलेल्या ठिकाणी तिचा पती सलमान रमजान शेख (वय २९) हा त्याचा मित्र हुजेफा आबेद शेख (वय २७) सोबत मोटारसायकलवरून आला. सलमानने, “तू मला तलाक का देत नाहीस?” असे विचारून पत्नीसोबत वाद घालण्यास सुरुवात केली. तसेच, कामाच्या ठिकाणी असलेल्या लोकांसोबत तिचे अनैतिक संबंध असल्याचा संशय घेऊन तिच्यावर संतापला.
ब्लेडने गळ्यावर वार
या वादाचे रूपांतर हाणामारीत झाले. रागाच्या भरात सलमानने आपल्याकडील ब्लेडने पत्नीच्या गळ्यावर वार केला. महिलेने तो वार अडवण्याचा प्रयत्न केला असता, तिच्या दोन्ही हातांवर, डोक्यावर, गालावर आणि कानाच्या मागे गंभीर जखमा झाल्या. आरोपीने तिला जीवे ठार मारण्याच्या उद्देशाने हा हल्ला केला.
दोन्ही आरोपी अटकेत
या घटनेनंतर पोलिसांनी तातडीने कारवाई करत पती सलमान शेख आणि त्याचा साथीदार हुजेफा शेख यांना अटक केली आहे.
