Dighi: An elderly woman was seriously injured after being hit by a speeding car; a case has been registered against the driver.दिघी (पुणे): भरधाव वेगाने आणि निष्काळजीपणे कार चालवून एका ६१ वर्षीय ज्येष्ठ महिलेला धडक देऊन गंभीर जखमी केल्याप्रकरणी दिघी पोलिसांनी कार चालकाविरुद्ध गुन्हा दाखल केला आहे. ही घटना ११ डिसेंबर २०२५ रोजी रात्री ७ वाजण्याच्या सुमारास दिघी येथील सई बाजार, साई पार्क कॉलनी परिसरात घडली.
नेमकी घटना काय?
मिळालेल्या माहितीनुसार, फिर्यादी राहुल हेमंत तांदळे (वय ३७, रा. तांदळे हाईट्स, दिघी) यांची आई सौ. वंदना तांदळे (वय ६१) या ११ डिसेंबर रोजी संध्याकाळी भाजीपाला आणण्यासाठी एकट्याच पायी चालत जात होत्या. त्या सई बाजार येथील सार्वजनिक रस्त्यावरून जात असताना, पाठीमागून आलेल्या एका भरधाव कारने (क्र. MH 12 WX 9826) त्यांना जोराची धडक दिली.
अपघात करून चालक फरार
आरोपी प्रविण नामदेव चव्हाण (वय ४५, रा. साई पार्क कॉलनी, दिघी) याने आपली कार हयगयीने आणि वाहतुकीच्या नियमांकडे पूर्णतः दुर्लक्ष करून चालवल्याचे फिर्यादीत म्हटले आहे. या धडकेमुळे वंदना तांदळे यांच्या डाव्या पायाच्या खुब्याला फ्रॅक्चर होऊन त्या गंभीर जखमी झाल्या. विशेष म्हणजे, अपघात झाल्यानंतर जखमीला मदत करण्याऐवजी आरोपी चालक घटनास्थळी न थांबता कारसह पळून गेला.
पोलिस कारवाई
याप्रकरणी २४ डिसेंबर २०२५ रोजी दिघी पोलीस ठाण्यात गुन्हा नोंदवण्यात आला आहे. आरोपीविरुद्ध भारतीय न्याय संहिता (BNS) कलम २८१ (बेदरकारपणे वाहन चालवणे), १२५ (अ) (इतरांच्या जीविताला धोका निर्माण करणे), १२५ (ब) आणि मोटार वाहन कायद्याच्या कलम १८४, १३२ (१) (क), ११९/१७७ अन्वये गुन्हा दाखल करण्यात आला आहे.
या प्रकरणाचा पुढील तपास पोलीस उपनिरीक्षक शिंगारे करत आहेत.
