चिखलीत भीषण ‘हिट अँड रन’: सिग्नलला थांबलेल्या दुचाकीला मिक्सर ट्रकची धडक; पती गंभीर जखमी, चालक फरार
चिखली, पुणे: पुण्यातील चिखली परिसरात एक धक्कादायक ‘हिट अँड रन’ची घटना समोर आली आहे. देहू ते आळंदी रोडवरील जाधववाडी येथील रिव्हर चौकात एका भरधाव सिमेंट मिक्सर ट्रकने सिग्नलला थांबलेल्या दुचाकीला पाठीमागून जोरदार धडक दिली. या भीषण अपघातात दुचाकीवरील व्यक्ती गंभीर जखमी झाली असून, अपघात घडल्यानंतर चालक जखमीला मदत करण्याऐवजी वाहन घेऊन घटनास्थळावरून पसार झाला आहे.
नेमकी घटना काय?
मिळालेल्या माहितीनुसार, ही घटना २२ डिसेंबर २०२५ रोजी दुपारी ३:३० वाजेच्या सुमारास घडली. फिर्यादी महिला आणि त्यांचे पती त्यांच्या टीव्हीएस कंपनीच्या दुचाकीने (क्र. MH 09 CT 1060) प्रवास करत होते. जाधववाडी येथील रिव्हर चौकात सिग्नल लागल्यामुळे ते थांबले असताना, पाठीमागून आलेल्या एका अज्ञात सिमेंट मिक्सर ट्रकने (क्र. MH 14 MT 5266) त्यांच्या दुचाकीला जोरात धडक दिली.
माणुसकीला काळिमा: जखमीला सोडून चालक पसार
अपघात इतका भीषण होता की, यात फिर्यादीचे पती गंभीर जखमी झाले. अपघात झाल्यानंतर संबंधित मिक्सर चालकाने थांबून जखमींना दवाखान्यात नेणे अपेक्षित होते, मात्र त्याने अत्यंत बेजबाबदारपणा दाखवत तिथून पळ काढला. या प्रकरणी पीडित महिलेने चिखली पोलीस ठाण्यात धाव घेऊन तक्रार दाखल केली आहे.
