Pune news
पुणे: वाहतुकीच्या नियमांकडे दुर्लक्ष करून भरधाव वेगात वाहन चालवणे (Pune Accident News)पुन्हा एकदा जीवघेणे ठरले आहे. पुण्यातील पाषाण रोडवर झालेल्या एका भीषण अपघातात २६ वर्षीय तरुणाचा मृत्यू झाला आहे. पोलिसांनी दिलेल्या माहितीनुसार, आरोपी वाहनचालक अपघातानंतर घटनास्थळावर न थांबता फरार झाला आहे. हा प्रकार ७ फेब्रुवारी २०२५ रोजी रात्री १० वाजताच्या सुमारास डीआरडीओजवळ घडला.
या प्रकरणी अभिषेककुमार उपाध्याय (वय ३१, रा. पिंपळे गुरव, पुणे) यांनी फिर्याद दिली आहे. फिर्यादी यांचा भाऊ आशीषकुमार सर्वानंद उपाध्याय (वय २६) हे रस्त्यावरून जात असताना अज्ञात इसमाने आपल्या ताब्यातील वाहन वेगाने, बेदरकारपणे चालवत त्यांना जबर धडक दिली. या अपघातात गंभीर दुखापत होऊन आशीषकुमार यांचा मृत्यू झाला. मात्र, आरोपी वाहनचालक घटनास्थळी न थांबता पळून गेला.
पोलिस तपास सुरू
घटनेची माहिती मिळताच चतुश्रृंगी पोलीस ठाण्याच्या अधिकाऱ्यांनी घटनास्थळी धाव घेतली. अपघातस्थळी सीसीटीव्ही फुटेज आणि साक्षीदारांच्या मदतीने आरोपी वाहनचालकाचा शोध सुरू करण्यात आला आहे.
वाहनचालकांवर कठोर कारवाईची मागणी
या घटनेनंतर स्थानिक नागरिकांनी भरधाव वाहनांवर कठोर कारवाई करण्याची मागणी केली आहे. पुण्यात अशा प्रकारच्या अपघातांचे प्रमाण वाढत असून, पोलिसांनी वाहतुकीच्या नियमांचे उल्लंघन करणाऱ्यांवर तातडीने कारवाई करावी, असे नागरिकांचे मत आहे.
