पुणे: शहरातील नगर रोड (Nagar Road) परिसरात गुन्हेगारीच्या घटनांमध्ये वाढ होत असून, येरवडा भागात एका धक्कादायक प्रकार समोर आला आहे. कारमध्ये बसलेल्या एका ५० वर्षीय व्यक्तीच्या डोक्यात बिअरची बाटली आणि दगडाने मारहाण करून तीन अनोळखी लुटारूंनी त्यांना लुटल्याची घटना घडली आहे.
याप्रकरणी मांजरी बुद्रुक येथे राहणाऱ्या एका ५० वर्षीय व्यक्तीने फिर्याद दिली आहे. त्यानुसार लक्ष्मीनगर पोलीस ठाण्यात तीन अनोळखी इसमांविरोधात भारतीय न्याय संहिता (BNS) कलम ३०९ (६), ३ (५) अन्वये जबरदस्तीने चोरी आणि मारहाणीचा गुन्हा दाखल करण्यात आला आहे.
नेमकी घटना काय? पोलिसांनी दिलेल्या माहितीनुसार, ही घटना १९ डिसेंबर २०२५ रोजी सायंकाळी साडेसातच्या (७:३०) सुमारास घडली. फिर्यादी हे नगर रोड, येरवडा येथील न्याती कंपनीच्या बाहेर आपल्या चारचाकी गाडीमध्ये बसले होते. त्यावेळी तिथे आलेल्या तीन अनोळखी व्यक्तींनी अचानक फिर्यादी यांच्यावर हल्ला चढवला.
आरोपींनी फिर्यादी यांच्या डोक्यात बिअरची बाटली आणि दगडाने मारहाण करून त्यांना जखमी केले. यानंतर आरोपींनी फिर्यादी यांच्या खिशातून आणि गाडीतून १२,००० रुपये रोख रक्कम, ८,००० रुपये किमतीचा मोबाईल आणि हातातील ५,००० रुपये किमतीचे घड्याळ, तसेच इतर महत्त्वाची कागदपत्रे असा एकूण २५,००० रुपयांचा ऐवज जबरदस्तीने चोरून नेला.
घटनेनंतर जखमी अवस्थेत फिर्यादी यांनी पोलीस ठाण्यात धाव घेत तक्रार नोंदवली. या प्रकरणी लक्ष्मीनगर पोलीस ठाण्यात गुन्हा क्रमांक ८६३/२०२५ अन्वये नोंद करण्यात आली असून, पोलीस पुढील तपास करत आहेत.