मध्यरात्री मेट्रो स्टेशनबाहेर घडला काळजाला भिडणारा प्रसंग; कॅबच्या शोधात उभ्या असलेल्या महिलेला भेटला जुना कॉलेजमित्र, सोशल मीडियावर कहाणी व्हायरल!
शहरातील एका मेट्रो स्टेशनबाहेर मध्यरात्री सासू-सुनेच्या जोडीसोबत घडलेला एक भावूक प्रसंग सध्या सोशल मीडियावर जोरदार चर्चेत आला आहे. रात्रीच्या वेळी घरी जाण्यासाठी कोणतीही कॅब उपलब्ध होत नसताना एका अनोळखी दिसणाऱ्या वाहनचालकाने त्यांना मदत केली खरी, पण पुढच्या काही मिनिटांत समोर आलेले सत्य दोघांच्याही डोळ्यांत नकळत अश्रू आणून गेले.
मिळालेल्या माहितीनुसार, उशिरा रात्री मेट्रोने प्रवास करून सासू आणि सून दोघीही बाहेर पडल्या. घर गाठण्यासाठी त्यांनी ॲपवरून अनेकदा कॅब बुक करण्याचा प्रयत्न केला; मात्र वेळ जास्त झाल्याने कॅब बुक होऊ शकली नाही. अखेर त्या रस्त्यावर इतर वाहनाची वाट पाहत उभ्या राहिल्या.
तेवढ्यात एका कारचालकाने त्यांच्याजवळ गाडी थांबवून लिफ्ट देण्याची तयारी दर्शवली. मध्यरात्रीच्या वेळी अशा प्रकारे अनोळखी वाहनात बसताना सासूच्या मनात भीती निर्माण झाली. मात्र, सुनेने चालकाच्या चेहऱ्याकडे बारकाईने पाहिले असता तो ओळखीचा वाटला. तिने सासूला धीर देत गाडीत बसण्याचा आग्रह केला.
गाडी काही अंतर पुढे जाताच चालक रिअर-व्ह्यू मिररमधून वारंवार मागे पाहत असल्याचे तिच्या लक्षात आले. तिने पुन्हा लक्षपूर्वक पाहिले आणि तिला धक्काच बसला—तो तिचा कॉलेजचा सर्वात जवळचा मित्र ‘रणजित’ होता!
जुनी ओळख पटताच तिने उत्स्फूर्तपणे विचारले, “रणजित, तू? किती बदललास रे…” चालकाने किंचित हसत उत्तर दिले, “तुला माझं नाव अजून आठवतंय तर!”
त्यानंतर दोघांनाही जुन्या आठवणींवर खूप काही बोलायचे होते. मात्र, बाजूला सासू बसलेली असल्याने संकोच आणि मर्यादांमुळे ती काही बोलू शकली नाही. गाडीमध्ये केवळ शांततेत नजरानजर होत राहिली. काही वेळातच घर आले आणि तिने गाडी थांबवण्यास सांगितले. तिने त्याला घरात चहासाठी येण्याचा आग्रहही केला; पण रणजितने “घाईत आहे” असे सांगून नम्रपणे नकार दिला. सासूने हाक मारल्याने उदास चेहऱ्याने आणि जुन्या आठवणींच्या कल्लोळात ती घराच्या दिशेने निघून गेली.
या प्रसंगानंतर रणजितने सोशल मीडियावर लाईव्ह येत आपला अनुभव मांडला. “कधीकाळी आम्ही एकमेकांसाठी सर्वस्व होतो, जिवापाड मित्र होतो. पण वेळेचा खेळ बघा, परिस्थिती अशी बदलली की आज हक्काने बोलायलाही मर्यादा आडव्या येतात आणि माणसं समोर असूनही चेहऱ्यावर अनोळखीपणाचा मुखवटा चढवावा लागतो,” अशा शब्दांत त्याने आपल्या भावनांना वाट मोकळी करून दिली. हा व्हिडिओ सध्या सोशल मीडियावर नेटकऱ्यांचे लक्ष वेधून घेत आहे.