पुण्यात दिवसाढवळ्या थरार! आंबेगावात गाडीतून उतरून ४० लाखांची रोकड असलेली बॅग हिसकावली; शहरात खळबळ.

Ambegaon News  : पुण्यातील आंबेगाव (Ambegaon) परिसरातून एका मोठ्या आणि धाडसी दरोड्याची (Robbery) घटना समोर आली आहे, ज्यामुळे संपूर्ण शहरात खळबळ उडाली आहे. भरदिवसा रस्त्याच्या मधोमध, गाडीतून उतरलेल्या तीन अज्ञात इसमांनी दोघा मित्रांना अडवून त्यांच्याकडील तब्बल ४० लाख रुपयांची रोकड असलेली बॅग जबरदस्तीने हिसकावून नेली. हा एखाद्या चित्रपटाच्या दृश्याप्रमाणे घडलेला ‘कॅश हिस्ट’ (Cash Heist) पाहून नागरिक भयभीत झाले आहेत. या गंभीर गुन्हेगारी घटनेमुळे (Pune Crime) पोलिसांसमोर मोठे आव्हान उभे राहिले आहे.

नेमकं काय घडलं?

ही घटना १५ जुलै २०२५ रोजी सकाळी पावणेनऊ वाजण्याच्या सुमारास आंबेगाव येथील बाबाजी पेट्रोल पंपासमोरील रस्त्यावर घडली. याप्रकरणी मूळचे धाराशिव येथील असलेल्या एका २८ वर्षीय तरुणाने आंबेगाव पोलीस ठाण्यात फिर्याद दिली आहे.

फिर्यादी आणि त्यांचा मित्र रस्त्यावरून पायी जात होते. त्याचवेळी, त्यांच्यासमोर एक चारचाकी गाडी येऊन थांबली. काही कळायच्या आत, गाडीतून तीन अनोळखी इसम उतरले आणि त्यांनी थेट फिर्यादीच्या मित्राच्या हातातील बॅगेला हिसडा मारला.

४० लाखांची लूट आणि आरोपी फरार

त्या बॅगेमध्ये तब्बल ४० लाख रुपयांची रोख रक्कम होती. आरोपींनी बॅग हिसकावताच ते वेगाने गाडीत बसून पसार झाले. हा सर्व प्रकार इतक्या वेगाने घडला की, फिर्यादी आणि त्यांच्या मित्राला प्रतिकार करण्याची किंवा कोणाला मदत मागण्याची संधीच मिळाली नाही.